Sign of Life

Erscht 4 Täg in Victoria BC...

... und es fühlt sich a wiene halbs Lebe. Fühl mi sehr wohl und gnüsses d’ Stadt und Umgebig z’entdecke. Statt mitem Bus fahri mitem Bike zur Schuel, das haltet fit, hilft mer noch de Schuel usz’lüfte und mini Umgebig ufe anderi Art kennez’lerne. Verschiedeni Trails – wie de Galooping Goose oder Lochside füeret dör di ganz Stadt und ufe in Norde. Absits vode Strosse und vielfach dörs Grüene oder am See oder Meer entlang.

Au as English rede hani mi ganz guet gwöhnt, au wenn mer mengmol am Obig de Chopf brummt – oder isches echt vom Asia-Slang adä Schuel?

Ufenthaltsruum

Mer hend müse underschribe dasmer währetem Unterricht wie au die Pause USSCHLIESSLICH English redet. Da isch mengmol e Useforderig, vor allem wenn Schwitzer ume sind.

Mini Hostfamily bestoht us de Lynda, ca 55jöhrig und erem Boyfriend Keith. 

mis Zimmer: rechts obe

my room

Mer wohnet zämä inere zimli grosse Stadt Wohnig mit 4 Badezimmer und richtig viel Platz. Han mis eige Zimmer und Badezimmer – luxery! Am Obig wert immer warm g’esse. Zum Lunch gits Sandwich. Heisst: 2 Toast mit Schinke zwöschetinne.

Am Obig bini zimlich müed und bin froh wenns ruhig zue und her got. Mol zämä choche, mol zämä „Amazing Canada Race“ luege, oder Blog schribe. Usserdem hemmer emel zimli Ufzgi.

Blackberries

Die grösschte Underschied bestönd bis ez idem dasi..

-       mengmol topplet so lang ha zum heigo, welt Stross nöd dete anefüert wo sie sött..

-       me Koreaner, Japaner, Taiwaner oder Chinese kenneglernt han also irgendwenn voher

-       am Morge – dank de humane Schuelzite – sogär Zit und Muse han zum Stilli Zit mache (!!!)

-       underwegs scho me Blackberries gseh und gesse han als irgendwenn söscht i mim Lebe

-       mus lüte wenni mitem Velo überhole, au wenn niemert im Weg isch – eifacht zum mi akündige

Soo.. das wers emol förs erschte.

Bin bis auf weiteres per whatsapp/email erreichbar.