Zahlen & Hintergründe

Back from 3 weeks Backpacking.

Wow – isch es unglaublichs Gfühl. Tusche noch 3 Wuche i de gliche Chleider und das Tag und Nacht!

Aber ez mol vo vorne und för eu es paar Zahle zum echli novollzieh was ich di ganz Zit gmacht han sitmer s’letschte Mol vonenand ghört hend.

12 Outdoor Educator und 3 Instruktore erkundet i 3 Wuche e Gebirgschetti vo 190km Längi. De 1. Tag wert de einzig sii womer de Bode chönd gse, welmer scho die erschte Nacht vom Schnee öerrascht werdet. Met de Täg dörwanderemer Gebiet met bis zu 1.5m Schnee. Das heisst mer laufet en Grossteil vode Zit Off-Trail, also absiits vode Weg – wels schlicht unmöglich isch zum gse wos verlaufet – trotz excellentem Mapreading. Und wenn mer tatsächlich ufem Trail gloffe sind, isches echt herti Arbet gsi, üs dör hüfthöche Schnee z’kempfe.

Im Verlauf vo dene 3 Wuche dörlaufemer es Gebiet vo insgesamt 80 Meile (128km) und machet insgesamt öber 13'500 feet elevations (4500 Höhemeter) und erklimmet usserdem de Peak vom Mount Geiki 13'300 feet (ca. 4500m ü.M.) höch. Jede vo üs trait nebscht de persönliche Usrüschtig öber 20 pounds (10kg) food. S’meischte i Pulverform wie zum Bispiel Gingerbread wo nume Wasser und echli Gwürz mues zuegfüegt werde, flour, salt, yeast and cheese (Mehl, Salz, Hefe und Chäs) för Pizza, oder dehydrated vegetables oder hash browns (dehydratedi Herdöpfel womer zerscht mues im Wasser iweiche). Zum Zmorge hets oft Oatmeal met Milkpowder, brown Sugar und Cinneamon (e Art Müesli met Milchpulver, brunem Zucker und Zimet).

Höt hani s’erscht mol wieder frische Salot und Frücht gesse und es isch echt ganz öppis speziells!

Blotere a beidne Füess, adä Achillessite und vorne erinneret mi at Strapaze. Usserdem hani beidi Hüftsiite bluetig gschabet vode Hüftgürt vom Backpack. Mini Bänder hend mi usserdem me als eimol im Stick lo, sodass di meischt Zit tapet gsi sind (- was wiederum die Blotere ge het), und mini Chnü hend Müeh gha all das Gwicht z’ trägä und denn no sovil Höhemeter laufe – da isch menmol echt e Qual gsi. X Ibuprofen hettet sölle helfe aber ebe.. Mini Zeche sind usserdem immerno taub vode 3 Wuche anhaltende Chelti und de ständige nasse Füess. Was uf uszähligi Rivercrossings (s'signifikantischte am 2. Tag - sit do permanent nasse und chalti Füess) und em viele Schnee zruggz’füere isch.

I merk gad, min Post isch echli en Dörenand vo allene mögliche Gedanke. Es isch echt schwierig de 3 wüchig Trip z’beschribe.

Uf de erscht Blick schienet die 3 Wuche recht ereignislos. Fascht jede Tag echli de glich Ablauf, was heisst:

6.00         Tagwach

7.00         Zmorge mache, Zelt und USrüschtig zemepacke

9.00         Loslaufe

17.00         acho am Öbernachtigsplatz, Zelt ufstelle, Znacht mache

19.00         Outdoor 1. Hilf Schueligsblock

21.00 is Bett

Me send i 3 verschiedeni Zeltgruppe ufteilt gsi und hend au i dene Gruppe g’chochet. Alli hend di gliche Lebensmittel öbercho und es isch up to us gsi, z’entscheide wenn mer was demit machet. Bin di erschte 10 Täg met de andere 3 Mädels im Zelt und de Chochgruppe gsi, noch 10 Täg hend mer Re-ration gha. Das heisst mer send zume Cabin pilgeret und hend dete uft Horsepackers vode Three Peaks Ranch gwartet wo üs neue Food und Gas zum Choche brocht hend. Sehr nostalgisch gsi die Packpferd gseh acho met Säck belade und all das im Schnee. Mer send en Grossteil vo dere Zit i Wiehnachtsstimmigs gsi und hend Wiehnachtslieder gsunge, eifacht, welt Umgebig sehr wienachtslich gsi isch J

Jede Tag hend mer neui Hikinggroups bildet – s Ziel isch gsi zum alli us de Gruppe besser kennelerne und met jedem irgendwie usz’cho. Das het sehr guet klappet. Usserdem hend mer jede Tag de Uftrag gha, das mer als 4er Gruppe selfsuficiant sind. Das heisst, jedi Gruppe het en ganze Satz Groupgear treit, was heisst:

stove and pot, fry pan, spatula, trowel, 2 bearsprays, dromedary, food, bear-rope, maps, aquamirror and bearfenz (Ofe – heisst, e Spritfläsche met Chochglegeheit zum ufklappe, Pfanne, Brotpfanne, Spachtel, Schüfeli – zum es WC-Loch grabe, Bärspray, Dromedar e Art Wassersack, Zesse, es Seil zums Esse an Baum ue henke – Vorsichtsmassnahme weg Bäre, Karte und Kompass, chemischi Wasserreinigungströpfli und es Bärfenz – heisst es Flexinet met Strom druff womer hend üsi Essenssäck öbert Nacht ietue – so isch de Food relativ sicher gsi vor Bäre und anderne Nagetier).

D’Landschaft do isch unglaublich. D’Berge sind impressiv und d’Wälder wunderschön und still. Und was au sehr speziell gsi isch, mer hend i dene 3 Wuche kein einzige Mensch gse ussert üsere Gruppe. De Chris – ein vo üsne Instruktore het gmeint, mer send uf jede Fall de letscht Kurs wo die Berge isch und me werdet di letschte Mensche sii zwüschet jetzt und em nögste Mai wo sich i dene Berge tummlet – wow! Cool to know!

Au als Gruppe hend mer üs entwicklet. Noch de Re-ration hend mer d’Zelt und Chochgruppe gwechslet. Bin also fortan met drü Mane underwegs gsi; Jessy 30gi Rettigssanitäter - Texas, Austin 26i Sozialpädagog innere Behinderteirichtig – Texas und Cameron 23gi Navy – Iowa. Sehr interessant. Vorallem mitem Jessy und em Austin öber Politik, Ungerechtigkeite und was tue z’schwätze. Oder au eifacht öber di verschiedene Useforderige wo so en Kurs mit sich bringt und wie deale demit. Usserdem hend mer sehr gueti Gspröch gha öber wo mer ane wönd, wasmer üs chönd vorstelle und wie Entscheidige treffe. Nöd dasmer e Lösig gfunde hettet, aber s’Gegesitige verzelle het sehr guet tue und isch interessant wo jede dra isch.

Die verschiedene Gedanke hend vor allem die letschte Täg, womer müed gsi sind und oft zimlich still gwanderet sind, bi mer sehr vil Rum igno. Han vil Ideä wies chönnt witergo. Es paar Neui und es paar Alti.

S’fühlt isch i dem Umfeld aber ganz anderscht a zum drüber notenke. Bin vil eifacht mit Jesus am wandere gsi und hanem verzellt und Froge gstellt. I verglich zu wienich mer söscht Gedanke dröber gmacht han, erlebi do und uf die Art e sehr relaxti Art zum öber mini Zuekunft noz’tenke und das isch seehr cool zum erlebe!!

Usserdem findis immer sehr spannend und inspirierend zum vo andere ghöre was sie sich öberlegge und wo eren Weg chönnt anegot oder wiitergo. – Hoff no me und no anders oder wiiter z’ghöre vo mine Mitstudente.

Joo, es tut so guet verusse z’sii. I de wunderschöne, stille, faszinierende und inspirierende Natur und jede Tag, jedi Minute z’stune, we sich d’Farbe am Himmel änderet, we intensiv mer Sterne chan gse, we ruhig und still sich die Wälder zeiget, we ufgregt d’Chipmunks us erne Nestli chömet, wennt Sunne före chunnt, d’Warnrüef vode Squirrels (Eichhörnli), wenn mer it Nöchi vo erem Bau chömet.

Und doch hani au met verschiedenste Useforderige z’tue gha wie:

-       s’Gfühl von nöd för voll gno z’werde, zum Bispil bim choche am Afang, weli ke Ahnig gha han, was Amis för Lebensmittel kompinieret (z.B. Teigware met Peanutbutter und brunem Zucker), oder wiemer die Lebensmittel chan öberhaupt verarbeite oder z’wenig schnell z sii bim Antwort gä..

-       Taubheit i allne 1’ Zeche wo bis ezte anehebe – heisst i gspüre nöd öbi warmi oder chalti Füess han und chans nur schlecht bewege – chunnt worschindlich vom viele abwärtslaufe

-       Körperlichi Useforderige wie es Pass womer erklomme hend wo SEHR heavy gsi isch. De Einzig Moment woni echt han wölle abhocke und brüele. Soo streng gsi. En gfühlte senkrechte Ufstieg för 2h met hüfthöchem Schnee und Gröll drunder, usserdem Schneehöhle vor grössere Felsbröcke uf de Ebeni vorem Pass – Horror gsi i dem Moment

-       Chälti – vor allem ide Nacht und zwor so extrem dasi alli mini Chleider, plus Regehose und –jagge agha han zum schlofe und so immerno gschlotteret han im Schlofsack – het dezue gfüert dasi Nacht för Nacht nöd me als 4-5h han chönne schlofe, bin aber trotz allem recht fit gsi

Gruppetechnisch sind d’Useforderige nonig soo gross gsi zum Glück. De ganz Trip isch recht harmonisch verloffe. Me hend ein Obig gha wo di einte echli Krise gschobe hend wellmer echt sehr en strickte Tagesablauf gha hend wiener obe gse hend und sehr wenig Zit blibe isch för üs selber. Vorallem au welmer üs, begründet dör de Schnee sehr langsam fortbewegt hend und drum oft erscht sehr spot am Lagerplatz acho sind.

Funny to know:

-                s’isch tatsächlich möglich zum glichzitig Erfrürige adä Oberschenkel und Sunnebrand ada Händ ha

-                mer die isigschte Chälti vo de Wind River Mountains s’Thema „Hitzschlag“ behandlet

-                was för verschiedeni Arte vo Schnee dases git, nass und rutschig, konfetti-like und glizerig, schwer, hert ...

-                s’fallt mer so gernöd schwer zu doosii – im Gegeteil hani s^Gfühl i chönnt no vil länger do blibe. Hang merkt dasi echt (emel bis ezt) nöd Müeh han zum im Usland si, ohni mis Umfeld, solangi au do gueti Lüt han und i das chan mache wo mer Spass macht – sehr spannend zum erlebe – chans nur empfehle ;-)

Was sind di nögste Ussichte?

Morn hemmer vom 8am – noon Wilderness first responder Prüefig – schriftlich und praktisch (sött eigentlich am lerne sii), am Nomittag hemmer Meeting met NOLS Cheffe zum di ganz Organisation echli besser kennelerne, zum Znacht treffemer üs mit de Climbing Instructore und esse metene Znacht, denn isch Climbingorientation, denn hoffentlich no e Stippvisite inere Bar.

Öbermorn packemer de ganz Food und Gear för; Climbing Section 16 Täg, Canyon Section 26 Täg und Winter Section 14 Täg...

Woow – time is running!!

Und denn Öber-öbermorn gots worschindli los.

Das heisst mer fahret los 10h Richtig Las Vegas, gönd dete go ichaufe fört Section (me werdet es Basecamp ha – und bin sehr glücklich, nöd müse umezieh) und denn witer is Teton Valley in Nevada. – Bin soo gspannt!!

Isch so e speziells Gfühl wieder zrug in Town z’sii noch dere intensive und herte Ziit. Mer send alli ganz ufgregt gsi zum zruggcho. Sind aber au sehr gspannt uf di nögst Section. Aber s’tut guet echli abefahre. Obwohl mer nöd vil Zit deför werdet ha, wiener gsend..

Tanke aber eu allne för all eues dratenke und bete. Metem English laufts gernöd schlecht, fühl mi wohler zu rede, vor allem au sit mis Teaching woni öber Spiesse, subungual Hematomas und fishhooks gha han sehr guet gange isch und e gueti Resonanz gha het. UND: i mues eifacht!! (und i wött au :-)

Tanke au för alli Mails und Facebooknochrichte woner mer gschickt hend, Hami riiesig öber jedes einzelne gfreut!! Soo schön met eu verbunde z’sii und sone starchs Network hinder mer z’wüsse – fühl mich so beschenkt und bin sehr im Glück!!

Tanke, tanke, tanke!!

Freu mi au wiiterhin vo eu z’ghöre und so doch ufe Art echli Ateil chönne ne was bi eu gad so lauft. Schick eu di allerliebschte Grüess und freu mi uf jedi Zile vo eu!

Hebet Sorg und bis gli

PS: Ich nimme a, das bald au es paar Fotene werdet folge. Leider het mini Camera scho nochere guete Wuche de Geischt ufgä. S’het aber trotzdem för einigi Schnappschüss glanget :-)